محمدعزتي دن بير شعر
باهار اوينيياجاخ
گئنه ده گؤي دونوني گئيدي باهار اوينيياجاخ
تيتره ديب قول قانادين باغدا چينار اوينيياجاخ
باغچالار ايچره گيريب باد صبا اسديره جك
ياپراق آلتينداكي بير جوت گيله نار اوينيياجاخ
مينه جك قير آتيني حاج باباخان چاپديراجاخ
بو مينيشلر سه سينه شانلي دييار اوينيياجاخ
سارانين ايل دونومي آد قويارام من بو ايله
سارانين حورمتينه چايدا سولار اوينيياجاخ
قوري عطشان ساري سونبول لره ايراد ائلمه
يئل لرين عشقينه اولدوقچا دوچار اوينيياجاخ
چون نيگار عشقينله جان وئره جك «ايتگين بئي»
شوقيله حشره كيمين سنگ مزار اوينيياجاخ
صابر عبادي عزيز ياوريميز بو شعرين ادامه سينده دئير:
سوزلرون گر اوخوسا نازلي نيگار اوينيياجاخ
ائده جك مست اوزوني چشم خومار اوينيياجاخ
وئراجاغ چه چه هيني باغدا ساري بولبول لر
صبره هچ دوزمييه جك بوته ده خار اوينيياجاخ
چالاجاخ قول قانادين بير بيريله صوبحيله شام
اوچاجاخ گؤيلره مين شوقيله سار اوينيياجاخ
گؤي چمنلر گول آچيب عطريني پخش ائيلييه جك
كند ايچينده دوزولن داشلي دووار اوينيياجاخ
كؤل ديبينده سكه جك نازيله كهليك فره سي
سازاق اسديقجه بوتون گرد وغوبار اوينيياجاخ
بو «عبادي» نه چيدي سوزلروه شعر قوشا
سن يازان سوزلره بيل صبر و قرار اوينيياجاخ